Saturday, August 2, 2014

TAKE: LANG SUMNYOKÉ DO:YING


                             ----Bhaigeswar Pogag
Leke:lo tani: tao: romang, sé ka:nam mo:písok du:né takamsé agomém ludungai.Ísíng-Élíng lang  péi péttang ta:bu:ngé agom ludungai émna do:yi:lo dung.
Lekelo Koje pa:tang émnam amo:ngkosin dungngai.Édé amo:do Take: adorko lang Sumnyo adorkosin dungngai.Bínnyi aipagné ajonai.Bínnyi doko tí:ngkolosin édílosin donyok tí:nyog-bosumangai.Akoné atíko pa:yemílo  akoném orsula dobosudungai.Émpila bínyim édé pa:ta:dok símín-péttangé aipé nésudungai.Bínyi aki: kila aríg-ésíngémté aséngo:pé ibosudungai.
Longékolo bínyi kajé ajona , ngonyi  Tabad  aríkko ilai émna ru:su-bosuto odokké Tabad aríkko ibosuka.Sumnyodé Take:démyang asutko kin-ya:ngo:dag émna aíém kinbo:sudungai.Tabad aríkko ibosuto.Tabad arígé írgopla aibosukang.Bínyik asindo aipé mé:pokang. Tabad dém orpansudolo Sumnyodé lukang-“ajona, ngom tu:yidém bilangka,no lérídém  la:toka.”Édémpé lula bí tu:yi:dém la:to odokké Take:mé lérídém bito.Sumnyobí doka:la ka:namé Tabaddé kodag.Odo asin asin dokki lusukang-“Tabad tu:yi:sé kodag.”Ngo Take:mé ayat yaddom aíé yatkepsuto.Su:pag kídar édílosin  tu:yingém langkuma:bo.Tu:yingé kodag.
Longékolo a:mro aríkko ibosulai émna Take:mé luto.Take:bí ainé agomé émna mé:poki gerra:pé émna lubosuto.Take:bí amo:ngém bíkké ale:dokki sebbukto.Sumnyobí amli: pillíkto.A:mé onjal jalpé jarsangka.Í:ngé:m annyipagdé rígí mobín-bosuto.Ammé binnyikké arígém ka:la ka:bodungai.
Longngé gíkam gíkampé bínnyikké a:mété minropkang.A:mém gaddí:été píngangkang.Bottané ngasotkosin bínnyikké lenkang.Ngasoddé a:mém ka:pé orpanbosuyyan?Sumnyobí lukang –“ajona,no tu:yidém la:toka.Ngo kéík bém la:pé.”Sumnyodé mé:ngkang,tabaddémpé  a:m tu:yidé:sin  kosa:péké.Émpila ngo supak kídar lérídém la:pé.Take:dé aiyé ajona ,nok asin mé:ngkampé orpantoka.No asutko kin-ya pa:yango:dag.Édémípé a:mém orpan bosuto.Bínyi a:m arígém mosibosuto.Take:bí a:m kídardém gatkumge:la komsudo lé:sito.Sumnyo bígom amrong kídardém gatkumge:la mosito.
Longékolo bínyi anu apin dobosunamko ito.Take:mé Sumnyobí apin dodopé goglíkto.Bí amrongdém apinpé alla bito.Take:bí dokangge:la lukang-“ajona,nok apinsé jamtak kadakson?.”Odo Sumnyo bí:sin doka:la ka:namé aropé jamtak kadagí:da.Ajona,a:mé sémpéi idag.Take:bí:sin mé:ngkang,aropé a:m apiné sémpéi idupé.
Longékolo Take:bí Sumnyo bímsin mibo tomto.Bí ambín ki apin alla bito.Sumnyo bí doka:la ka:name aipé doppo:pé doto.Odo Sumnyo bí lukang-“ajona,apinsé doppo,nomsin dotélíkmílo aipé dopoye.”Odo Take:bí pésoki arung ara:pé ngéngangkangku.Take:dé arung ara:bokké lukang-“Ajona,tamedém ledalíktok,ngo apin akunkoda bias:líkpé.”Odo Sumnyodé tame:dé arung arado:pé ledyi:líkto.Take:bí ale so:nyidokki  Sumnyo ké tame:dém sebgapto.Sumnyobí kinamku:bdokki jé:ngosukang.Odo tani: ako étor torra dagai.Sumnyoké jé:namdém tadge:la tauto-“Ai,Sumnyo,okko ikan?”Ataya luyobong,ngok Take: ajonbí apin biye émgela sebgapto.Atai,nom okkom lagidang,édéméi  bipé,ngom sé ngasotsokki moturpo:teika.Odo étor torné tani:dé kuyapko bomna Take:dém ngunsa:to.Daddopé matpítsula Sumnyodé dukpísutoku.Tani:dém lukang atai nom ngo apta pa:mílo ador adorko lo:dísém bisupé.
Édémpé lo:díém Sumnyo bí apta bisula tani:dé dore: tí:re: atíésin kamangai.Bí lo:dípé Sisuk-Sile: lok adíném loda bíkké okum yapkurdo alongé podompé domna dungngai.Édém longékolo tani ako ka:pasuto.Tani: yeru:lo agomdé déjer déyerkang.Longékolo do:lung tani: kídardé bím ajeng jé:la kébangko ba:to.Do:yidém do:lung tani:ém lubima:mílo do:ludokké yotpak-ye émna luto.Sumnyodé tani:dém sidaggom bínyikké ara:ng agomém édílo:sin sé:komté lumapéka émna petum-tagai.Kapéi ila no agomdém amme lubipé émmílo nomsin dopak-ye émna lutungai.Édémpila bí kébangém luto-“Réngama,ngo ara: do:yidém sémpé lulamang.Ngom bottané yogír dírdangko lagiye.Édé ara:do dura:lapak agomdém takamké tatkolo lulaye.”Odo do:lungé bottané díldangko jongangge:la ara:do du:mogela do:yidém réngamé lumokang-“Réngama,longékolo sumnyodok tame:dém réggabla,ngo mopit bika,émpila bí ngom lo:dípé apta bisuye émna togésukang.Édé longédokké ngom lo:dípé ador adorko dumsung-Sisuk adiném bisutíla dung.”Agomdém lungabé ma:dapé Sumnyodé kébang aradokkém dílda:dok tétépé sobomna botténé mo:né si:lung ara:lo:pé bomkangku.Odo tani:dok kaki:dé apin keno:la gíríd-gorod émna béngkang.Odo Sumnyodé tauto-“Angonga,édé okkon?”odo tani:dé lukang-“Lekelok nom sebgabné take:dé.”Odo tani:dém mépakla pésoki sumrobla bérratsula ka:ma:pé Sumnyodé tani:dém mépakla dukkangku.
*****************************************



No comments: